Sakonnin Masu Karatu (2016) (11)

Ci gaban sakonnin masu karatu.  A sha karatu lafiya.

90

Assalamu Alaikum Baban Sadik. Da fatan kana Lafiya.  Allah ya saka da alheri ya kuma kara basira.  Tambayata a nan ita ce: meye banbanci tsakanin “Android” da “Nokia Lumia” na kamfanin Microsoft? Gaskiya ne manhajojin da suke aiki a wayar Android ba sa aiki a Nokia Lumia na Microsoft? Don Allah kayi min Karin bayani.  Daga: Ibrahim A. Ahmad jihar Lagos: ibrahimaaahmad@gmail.com  

Wa alaikumus salam, barka ka dai Malam Ibrahim.  Akwai bambanci mai girman gaske tsakanin manyan manhajojin biyu.  Domin kamfanonin da suka gina su daban-daban ne, sannan tsarin kasuwancinsu duk ya sha bamban.  Babbar manhajar Android na kamfanin Google Incorporated ne dake kasar Amurka, ta hadin gwiwa da wasu kamfanonin waya da harkar sadarwa kusan goma.  Tana daga cikin shahararrun babbar manhajar wayar salula da ake ji dasu a duniya a yau.  Sadda kamfanin Nokia ya saye kamfanin Symbian da ke baiwa sauran kamfanonin waya irin su Samsung da LG da Motorola lasisi, sai suka koma kan wannan babbar manhaja ta Android. Ga dukkan alamu, wannan na daga cikin abin da ya daga su, har a karshe suka shallake kamfanin Nokia a kasuwar wayar duniya baki daya. Nau’in wannan babbar manhajar waya dai ita ce Android 6.0, duk da cewa ana gab da fitar da nau’i na bakwai, wato: “Android 7.0”, wacce aka sanya wa suna da: “Noughat.

Ita kuma babbar manhajar waya ta Windows Mobile (dake dauke kan wayoyin “Windows Lumia”), na kamfanin Microsoft ne da ke kasar Amurka, wato babban kamfanin kera manhajar kwamfuta da yafi kowanne girma da kudi da tasiri a harkar sadarwar zamani a duniya kenan. Wannan babbar manhaja a halin yanzu tana kan manyan wayoyin salula na kamfanin HTC, da Nokia. Kuma galibin wayoyin salula na kamfanin Nokia da ake ji dasu a duniyar yau irin su Lumia 1020, da Lumia 920, da Lumia 720, da Lumia 620, da Lumia 520 duk suna dauke ne da wannan babbar manhaja ta Windows Mobile.  A halin yanzu wannan kamfani na Microsoft ya saye bangaren kera wayoyin salular kamfanin Nokia baki daya. Wannan ke nuna cewa nan gaba duk nau’ukan wayoyin salula masu dauke da sunan kamfanin Nokia za su rika zuwa ne da babbar manhajar Windows Mobile.

Bambancin da ke tsakanin wadannan manhajoji dai a fili yake, duk da cewa akwai abin da ya hada tsakaninsu.  Abin da ya hada tsakaninsu shi ne, dukkansu manhajojin wayar salula ne masu dauke da siffofin da ke baiwa wayar salula dabi’un kwamfuta, wato Smartphone.  Ire-iren wadannan dabi’u kuwa su ne; manhajar Imel dawwamammiya mai iya isar da sakonnin Imel ga mai waya nan take ba sai ya shiga manhajar ba (Push Mobile Email).  Sai manhajar hadawa da tarawa da kuma tura bayanai masu inganci, irin su hanyoyin karanta jaridu, da shafukan abota – irin su Facebook, da Google+, da Instagram da sauransu – da nagartacciyar fasahar Bluetooth, da nagartattun hanyoyin aika sakonnin tes da hotuna da bidiyo, da kuma hanyoyin mu’amala da kwamfuta kai tsaye, musamman ta hanyar tsarin Mini USB Ports, sai uwa uba nagartacciyar hanyar sadarwa ta Intanet.

- Adv -

Abin da ya raba tsakaninsu kuma shi ne; kowanne daga cikinsu na da wasu masarrafai ko tsare-tsare wadanda suka kebanci kamfanin wayar da ya kera su.  Misali, babbar manhajar waya ta Android da ke kan wayar salula na kamfanin Samsung, da wanda ke kan wayar salula na kamfanin LG, asalin tsarinsu daya ne. Amma kowannensu na da wasu masarrafai da tsare-tsare da suka bambanta shi da wayar da wani kamfani daban ya kera ba shi ba.  Haka abin yake a bangaren Windows Mobile.

A bangaren babbar manhajar Android, akwai masarrafai nau’uka biyu. Akwai masarrafan babbar manhajar, kamar su rajistar lambobi (Contacts), da manhajar sakonnin tes (Messages), da tsarin kira (Phone), da cibiyar masarrafai – na kyauta da na kudi – (Google Play Store), da dai sauransu. A daya bangaren kuma akwai masarrafan kamfanin da ya kera wayar.  Idan Samsung ce wayar, za a samu cibiyar masarrafan kamfanin Samsung (Samsung Apps), da cibiyar hirar ga-ni-ga-ka (Chat On) da dai sauransu.  Haka abin yake a bangaren wayoyin salula kirar kamfanin LG, da HTC da dai sauransu, wadanda ke dauke da babbar manhajar Android.

Idan muka koma bangaren Windows Mobile kuma za mu samu kusan dukkan masarrafan da ke cikin wayar duk na kamfanin Microsoft ne. Idan ka saba amfani da kwamfuta mai dauke da babbar manhajar Windows, za ka ga duk manhajojin da ka saba amfani da su a kwamfuta, duk suna nan a cikin wayar, sai dai nau’insu ne ya bambanta. Ma’ana wadanda ke wayar salula an kera su ne don a rika amfani dasu a kan wayar.  Sai kuma babbar cibiyar masarrafar kamfanin waya.  Misali, idan Lumia ce, za ka samu babbar cibiyar masarrafan kamfanin Nokia, wato: Nokia App Store.

Bayan wadannan manyan manhajojin wayar salula, akwai Asha na kamfanin Nokia, da iOS na kamfanin Apple, da BlackBerry OS da BlackBerry 10, duk na kamfanin Research In Motion da ke gab da durkushewa a halin yanzu. Akwai kuma wadanda ake sa ran za su bayyana nan ba da jimawa ba. Daga ciki akwai Firefox OS na kamfanin Mozilla Foundation, da kuma Ubuntu Touch OS na kamfanin Canonical, wadanda suka samar da babbar manhajar kwamfuta na “Ubuntu”, wanda kyauta ne a halin yanzu.  A baya akwai wadanda suka kwanta dama wajen sama da 50, saboda wucewar zamani.

Bangaren tambayarka ta biyu kuma, eh, dole a samu haka; maana, kowace wayar salula mai dauke da babbar manhaja tana gudanuwa ne kan manhajoji (Apps) ne da suka kebanceta.  Babbar manhajar Android ta kebantu da nata manhajoji ne kamar yadda babbar manhajar Windows Phone ta kebanta da nata.  Sai dai kuma, a halin yanzu akwai masu gina babbar manhajar wayar salula da yawa a duniya, wadanda ke gina wa kowace babbar manhajar waya nau’in manhajar da suka kebanceta.  Yadda kake da manhajar “Whatsapp” a wayar Android, haka za ka samu a wayar Lumia.  Sai dai baza ka iya saukar da wanda aka gina wa Android ka dora wa wayar Lumia kuma manhajar ta hau ba, balle ka iya amfani da ita.  Ko da kuwa sunayensu daya ne.  Da fatan ka gamsu.

- Adv -

You might also like
Leave A Reply

Your email address will not be published.